العلم الزائف مناهل ثابت نموذجاً

وضاح عثمان (2)

مناهل ثابت Manahel Thabet - ج2 بعض الجوائز والعضويات ومعادلتها المزعومة

لم تكتف مناهل بحكاية التلميع اللي شرحناه في الجزء الأول فدخلت علينا بعد كذا بحكاية اختراعها لمعادلة لقياس المسافات في الكون في غياب الضوء وقالت ان المعادلة هذي تقع في 350 صفحة وانها قدمتها لجهة ما ورفضت الإفصاح عن تلك الجهة بحجة أنها تنتظر منحها براءة اختراع علشان محد يستولي عليها!

 بالتوازي مع ذلك بدأ الإعلام يتحدث عنها أكثر وكلما سأل واحد نفسه سؤال: ايش علاقة الهندسة المالية (اللي المفروض انه تخصصها) بالفيزياء وبما تقول مناهل انه "رياضيات الكم" تلاقي الكل ينط لك ويبرر الأمر بأن المرأة ذكية جداً وانه تم اختيارها كعبقرية العالم من قبل منظمة برين ترست!

طيب هل هذا سبب كافي ؟ هل لأنه منظمة برين ترست اختارتها كعبقرية العالم خلاص نصدق حكاية المعادلة؟

خليني ابسطها لك بإمكانك تعتبرالمنظمة هذي زي اي منظمة من الـ 11 الف منظمة مجتمع مدني الموجودة في بلادنا، يعني مثلاً لو منظمة فلان الفلاني في صنعاء منحتك جائزة إسمها جائزة "النسر المشنوق على سفح جبل نقم" فهل تتوقع انك لو رحت اميركا بيستقبلوك استقبال الأبطال بإعتبارك ويليام والاس؟

الاجابة طبعاً: لا ولا حد بيعبرك ونفس الامر ينطبق على منظمة تمنح لقب دماغ العالم خصوصاً لما يكون اصحابها: توني بوزان وريموند ني ومن رعاتها واحد اسمه الامير محسن علي خان صاحب حيدراباد واتذكروا الاسماء هذي علشان بنلاقيها تتكرر بعد كذا ونحن نستعرض سيرة مناهل!!

هذا غير لما تكون انت نفسك ممثل للمنظمة هذي في الشرق الأوسط وشمال افريقيا، ايوه بالضبط زي ما اقلكم كذا لا تندهشواولا حاجة، المنظمة اللي منحت مناهل هذا اللقب تعتبر مناهل سفيرتها في الشرق الأوسط وشمال أفريقيا!! 

  

هذا طبعاً غير علاقتها الشخصية بالأسماء اللي موجودة فوق واللي زي ما قلت لكم بنلاقيها تتكرر بعد كذا

شفتوني وانا اجيب القاب لنفسي؟ ^_^

من ناحية اخرى هي نائبة رئيس وورلد انتلجنس نتورك اللي تعمل اختبارات الذكاء والهليلة اللي تصاحبها من انه فلان عبقري وذكري ومقياس ذكائه كذا وكذا، وبالصدفة البحته برضه بتلاقي ان توني بوزان وريموند ني برضه اعضاء فخريين فيها !

اوف مالهم كذا عاملين زي الحلقة/ ربّطية في كل مكان ;)

  

لو جيت كمان تدقق شوية في الالقاب والجوايز حق مناهل بتلاقي حاجة عجب، جرب ابحث مثلاً عن اصغر فائزة بامرأة العام 2000 من قبل اتحاد المرأة من اجل السلام العالمي او ابحث عن جائزة التميز الدولية والبيئية والانسانية العالمية او ميدالية الشهرة في العلوم او جائزة الامير البرت الخ الخ من الجوائز اللي تقول انها تلقتها، وقدك السمخ لو لقيت اي معلومات عن هذي الجوائز!!!

 المعلومات المتاحة عن تلك الجوائز تسردها مناهل لما تهدر على نفسها وغير موجودة في مواقع تلك الجهات ابداً، وطبعاً كل المواقع الاخبارية والصفحات عاملة للموضوع نسخ ولصق بالحرف زيما هو تماماً وربما ان الامر ينسحب على كل الشهادات والالقاب ال 130 اللي تقول انها تمتلكها

الفكرة طبعاً مش في حصولها على كل هذي الـ 130 لقب وشهادة وجائزة وانما في اهمية هذي الشهادات والالقاب فعلياً وفي الطريقة اللي تستخدم فيها مناهل هذي الالقاب والشهادات خصوصاً لما يوصل الموضوع للحديث عن العلم، هي حره وربنا يفتح عليها بمائتين لقب كمان من قبيل اصغر حاصلة واكبر عالمة واذكى امرأة واقوى شخصية هذا مش موضوعنا لأن امر هش ويكشف حقيقة صاحبة بمرور الوقت انما اللي يهمنا هو الجانب العلمي وهو امر مافيبوش صفاط ولا استهتار ولا اكبر ولا اصغر ولا اقوى.

خلاصة الحلقة 2:

بخصوص المعادلة: كلام فارغ، لم تقدمها لمجلة علمية او مؤسسة بحثية ولا يوجد لديها ابحاث سابقة حول نفس الموضوع كل ما عملته انها اتجهت فقط للإعلام.

بخصوص الالقاب الممنوحة من برين ترست وورلد انتلجنس نتورك: شفنا ارتباطها بالمنظمتين/الجمعيتين وحتى ان اهملنا هذا الارتباط فلا يعني شي ان مقياس ذكائك مرتفع او انك حصلت على لقب دماغ العالم فإن الكلام العلمي اللي تقوله صحيح!

بخصوص الالقاب والجوائز الاخرى: لم اجد لها اثر وتوثيق من مصادرها غير انه مناهل تقول انها حصلت عليها فعلياً وفي كمان سؤال: كيف واحدة تخصصها هندسة مالية معاها معادلة في رياضيات الكم وتكرم من منطمات بيئية وانسانية وسفيرة نوايا حسنة !